Arferion da ynglŷn â ffotograffiaeth, gwefannau a chyfyngau cymdeithasol
Ffotograffiaeth
Mae cyhoeddi erthyglau a lluniau mewn cylchlythyron clwb, gwefannau, papurau lleol ayb. yn ddull ardderchog o gydnabod cyflawniadau pobl ifanc ac i hyrwyddo eich sefydliad a’r gamp yn gyffredinol. Fodd bynnag, mae’n bwysig lleihau’r risg o rywun gamddefnyddio delweddau o blant mewn modd anaddas. Mae technoleg ddigidol yn ei gwneud yn hawdd i dynnu, storio, anfon, trin a chyhoeddi delweddau. Wrth gydnabod a chyhoeddi canlyniadau pobl ifanc, h.y. enillwyr cystadlaethau, byddwch yn ofalus wrth gyhoeddi delweddau ac enwi’r bobl ifanc.
Mae dwy egwyddor i’w cofio:
Cyn tynnu lluniau neu fideos, rhaid cael caniatâd ysgrifenedig y plant a’u rhieni/gofalwyr ar gyfer tynnu lluniau a’u defnyddio:
- Dylid cynnwys ffurflen rhoi caniatâd gyda phob ffurflen gais i gystadlu (Ffurflen Caniatâd Rhiant Dogfen Sampl ‘All Afloat’).
- Dylai unrhyw ffotograffydd neu aelod o’r wasg a’r cyfryngau sy’n mynychu digwyddiad fod yn gwisgo gwybodaeth i’w adnabod ar bob adeg a dylai gael briffiad ymlaen llaw ar eich disgwyliadau am ei ymddygiad e/hi a’r materion sydd yn cael eu trafod yn y canllawiau hyn.
- Peidiwch â gadael i ffotograffydd gael mynediad heb ei oruchwylio at bobl ifanc yn y digwyddiad nac i drefnu sesiynau ffotograffiaeth tu allan i’r digwyddiad.
- Dylid hefyd cael caniatâd i ddefnyddio fideo fel cymorth hyfforddi. Dylai unrhyw ddefnydd arall gan hyfforddwr gael ei ystyried fel torri Côd Moesegol ac Ymddygiad.
- Rhaid cymryd gofal wrth storio a chael mynediad i ddelweddau.
Wrth gyhoeddi delweddau, gwnewch yn siŵr eu bod yn addas ac nad ydych yn cynnwys unrhyw wybodaeth fyddai’n galluogi rhywun i gysylltu gyda’r plentyn.
- Mae’n well defnyddio siot gyffredinol o’r rhai sy’n cymryd rhan ar y dŵr, neu siot o grŵp o enillwyr, heb eu henwi’n unigol.
- Os byddwch yn cydnabod cyflawniadau hwyliwr/wraig unigol ac yn dymuno cyhoeddi ei enw/henw gyda’r llun, PEIDIWCH â chyhoeddi unrhyw wybodaeth arall (e.e. ble mae e/hi yn byw, enw’r ysgol, hobïau a diddordebau eraill) gallai hynny alluogi rhywun i gysylltu â’r plentyn, cyfeillachu neu feithrin perthynas amhriodol gyda’r plentyn.
- Sicrhewch fod y bobl ifanc yn y lluniau wedi eu gwisgo’n addas, i leihau’r risg o ddefnydd anaddas.
Mae’r mwyafrif o weithgareddau hwylio’n digwydd mewn ardaloedd sy’n agored i’r cyhoedd ac felly mae’n amhosibl rheoli pob ffotograffiaeth, ond dylid riportio unrhyw bryderon am ffotograffiaeth amhriodol neu ymwthiol, neu ddefnydd amhriodol o ddelweddau, i swyddog amddiffyn/lles plant y sefydliad a’i drin yn yr un modd ag unrhyw bryderon eraill am amddiffyn plant. Dylai rhieni a chynulleidfa fod yn barod i ddatgelu pwy ydyn nhw os gofynnir am hynny ac i ddatgan eu rheswm dros y ffotograffiaeth/ffilmio.
Ni ddylid caniatáu camerâu neu gamerâu ffôn mewn ardaloedd gwisgo a newid dan unrhyw amgylchiadau. Dylid ystyried eu defnydd gan bobl ifanc fel ffurf o fwlio.
Gwefannau a Chyfryngau Cymdeithasol
Wrth hyrwyddo eich clwb ac annog eich aelodau i ryngweithio drwy wefan neu rwydwaith cymdeithasol megis Facebook, mae rhai materion y dylid eu cofio mewn perthynas â phlant a phobl ifanc:
- dilynwch ganllawiau ‘All Afloat’ ar y defnydd o ddelweddau plant (gweler yr adran uchod ar Ffotograffiaeth)
- sicrhewch fod y cynnwys a’r iaith ar eich gwefan neu dudalen, yn cynnwys cyfraniadau i flogiau, fforymau ayb, yn addas i ymwelwyr ifanc ac heb fod â chyswllt uniongyrchol â deunydd anaddas ar wefannau eraill
- darparwch broses eglur i rieni ac eraill i riportio cynnwys anaddas neu fwlio ar-lein ac i ofyn am gael diddymu’r cynnwys
- cael gweithdrefn gadarn i ymdrin â ac asesu adroddiad neu gais o’r fath a gweithredu’n ddiymdroi i ddileu’r deunydd tramgwyddus.
Ni fydd ‘All Afloat’ yn defnyddio cyfryngau cymdeithasol i gysylltu’n uniongyrchol â phlant a phobl ifanc.
Mae Mudiad y Sgowtiaid yn cynhyrchu canllawiau gonest i oedolion a phobl ifanc ar sut i ddefnyddio gwefannau rhwydweithio cymdeithasol ac mae rhain i’w cael ar www.scouts.org.uk
Gwefan arall sy’n cynnig gwybodaeth am fod yn ddiogel ar-lein ydy www.thinkuknow.co.uk
